नेपालगन्ज बाँके,
विभागीय प्रतिद्धन्द्धी नेपाल पुलिस क्लबलाई १–० ले पराजित गर्दै सशस्त्र प्रहरी बलको एपिएफ क्लब पहिलो लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको च्याम्पियन बनेको छ । इन्जुरी समयमा गीता रानाको हेड गोल नै एपिएफलाई बिजयी बनाउन सफल भयो ।
आठ टोली सहभागी प्रतियोगिताको विजेता एपिएफले ५ लाख ५ हजार ५५५ रुपैयाँ र उपविजेता नेपाल पुलिसले २ लाख ५० हजार रुपैयाँ, ट्रफी, मेडल प्राप्त गरेका छन् । एपिएफ लगातार तेस्रो मोफसल प्रतियोगिताको उपाधि जित्न सफल भयो । यसअघि इलाम र चितवन गोल्डकपको उपाधि जितेको थियो । राष्ट्रिय टोलीका एक दर्जन खेलाडी समावेश गरेको एपिएफले त्यसअघि महिला लिगको उपाधि उचालेको थियो ।
एपिएफले पहिलो खेलमा कर्णाली प्रदेशलाई ६–० तथा सेमिफाइनलमा रौतहट जिल्ला फुटबल संघलाई ३–० ले हराएको थियो । यता, पुलिसले पहिलो खेलमा भारतको सिलिगुडी एफसीलाई ४–० तथा सेमिफाइनलमा भने विभागीय अर्को टोली त्रिभुवन आर्मी क्लबलाई सेडनडेथमा ६–५ ले पराजित गरेको थियो ।
खेलको प्लेयर अफ द फाइनल एपीएफका गिता राना घोषित भइन । उनलाई राष्ट्रिय खेलकुद परिषदका सदस्य दिनेश बिष्टले नगद रु ५ हजार प्रदान गरे । रेफ्री कृति सेन ,जमुना आले ,अमर घले र कृष्ण खत्री लाई बाँकेको कोहलपुर नगरपालिकाका कार्यबाहक नगर प्रमुख संगिता सुवेदी र खजुरा गाउँपालिकाका उपाध्यक्ष मन्जु मल्लले मायाको चिनो प्रदान गरेका थिए । यसैगरी आजको उत्कृष्ट गोल रक्षक नेपाल पुलिस क्लबका उषा नाथलाई नेपाली कांग्रेस बाँकेका सभापती नारायण प्रसाद गौडेल र नेकपा एमाले बाँके अध्यक्ष निरक गुरुङले नगद रुं १० हजारले सम्मान गरेका थिए ।
यसैगरी उत्कृष्ट डिफेन्डर एपिएफका गिता राना,स्ट्राइकर अनिता केसी र प्रशिक्षक भगवती थापा लाई सम्मान गरीएको छ थियो । यसैगरी सर्वोत्कृष्ट खेलाडी एपीएफका क्याप्टेन अनिता बस्नेतले नगद रु २५ हजार हात पारेकी छिन ।
