कुशल दलामी
बाँके:हरितालिका तिजको अवसरमा दोस्रो बैजनाथ बृहत् तिज महोत्सव २०८२ आगामी भदौ १० गते बैजनाथ–६ स्थित बैजनाथ गाउँपालिका स्तरीय रंगशाला लालपुर खेलमैदानमा आयोजना हुने भएको छ ।
बैजनाथ राष्ट्रिय दैनिकको आयोजनामा तथा न्यू हरियाली सामुदायिक वन उपभोक्ता समूहको समन्वय र सहजीकरणमा महोत्सव संचालन हुने सामुदायिक वनका अध्यक्ष रामकुमार रानाले जानकारी दिनुभयो । स्थानीय व्यवसायी, युवा संघ–संस्था र सामाजिक संघ–संस्थाको सहयोगमा हुन लागेको यस महोत्सवलाई बैजनाथ गाउँपालिका स्तरीय रंगशालामा दोश्रो बैजनाथ बृहत् तिज महोत्सव संचालन गरिनेछ ।
महोत्सवमा स्थानीय महिलाहरुलाई नाचगान तथा मनोरञ्जनका विविध प्रस्तुतिहरूमा सहज सहभागिता दिलाइनेछ । विशेषगरी बैजनाथकै गर्वको सम्पदा मानसरोवर बोटानिकल गार्डनको प्रचार–प्रसार र पर्यटन प्रवद्र्धन गर्ने उद्देश्यसहित महोत्सव आयोजना गरिएको आयोजक तथा बैजनाथ राष्ट्रिय दैनिकका प्रकाशक कुशल दलामीले बताउनुभयो ।
तिज पर्वलाई महिलाहरूले, पतिको दीर्घायु र परिवारको सुख–शान्तिका लागि व्रत बसेर श्रद्धा–भक्तिपूर्वक मनाउने गर्छन् । दर खाने, नाचगान गर्ने र सामूहिक भेटघाटमार्फत महिला एकताको सन्देश प्रवाह गर्ने यो पर्वलाई महोत्सवले अझ सांस्कृतिक एवं सामाजिक उत्सवका रूपमा स्थापित गर्ने अपेक्षा राखिएको छ ।
कार्यक्रम सफल बनाउन स्थानीय ब्यापारी युवा क्लब संघ संस्था एवं स्थानीयहरुको विभिन्न सामाग्री निशुल्क उपलब्ध गराएका छन् ।
