काठमाडौं, भदौ २८ – केही दिनदेखिको असहज परिस्थितिपछि जनजीवन सामान्य हुँदै गर्दा नेपालका सार्वजनिक यातायात पनि बिस्तारै नियमित बन्न थालेका छन्। तर अझै पनि पूर्ण सुरक्षाको प्रत्याभूति नभएको भन्दै नेपाल यातायात व्यवसायी राष्ट्रिय महासङ्घले गाडी सञ्चालन अघि स्थानीय प्रशासनसँग समन्वय गर्न आह्वान गरेको छ।
महासङ्घका वरिष्ठ उपाध्यक्ष सरोज सिटौलाले भनेका छन्, “केन्द्र सरकारले औपचारिक रुपमा सार्वजनिक यातायात सञ्चालन गर्न स्वीकृति दिएको छैन, तर स्थानीय तह र सरोकारवालासँग समन्वय गरी गाडी चलाउन सकिने अवस्था बनिसकेको छ।”
महासङ्घले यसअघि विषम परिस्थितिमा गाडी नचलाउन निर्देशन दिएको थियो। निषेधाज्ञा र कर्फ्युका कारण गत सोमबारयता सार्वजनिक गाडीहरू पूर्ण रूपमा ठप्प भएका थिए। तर पछिल्ला दुई दिनयता उपत्यका भित्र र बाहिर गाडीहरू पुनः सञ्चालनमा आउन थालेका छन्।
विशेष गरी गोङ्गबु नयाँ बसपार्कबाट बाहिरिने गाडीहरूको सङ्ख्यामा उल्लेख्य वृद्धि देखिएको छ। उपत्यकाभित्रै पनि छिटपुट रूपमा यातायात सञ्चालनमा आएको छ। यसले जनजीवन सामान्यतर्फ उन्मुख भएको संकेत गरेको छ।
सरकार परिवर्तनपछि सार्वजनिक अवस्थाहरू सहज बन्न थालेका छन्। नयाँ प्रधानमन्त्रीको रूपमा सुशीला कार्कीको नियुक्तिसँगै रातारात राजनीतिक र प्रशासनिक गतिविधि तीव्र भएको देखिन्छ। संसद विघटन भइसकेको छ र आगामी फागुन २१ गतेका लागि चुनावको मिति तोकिएको छ। यद्यपि, मुख्य तीन दलले उक्त निर्णयको आलोचना गर्दै विरोध जारी राखेका छन्।
शान्ति सुरक्षाको दृष्टिले पनि देशका विभिन्न स्थानमा सकारात्मक संकेत देखिन थालेका छन्। चितवनजस्तो जिल्लाले पूर्ण रूपमा कर्फ्यु र निषेधाज्ञा हटाएको छ भने ललितपुर र भक्तपुरमा पनि समय-सीमा तोकी निषेधाज्ञा खुकुलो पारिएको छ। प्रमुख जिल्ला अधिकारीहरूका अनुसार जनजीवन सहज बनाउन आवश्यक निर्णयहरू क्रमशः लिइँदै छन्।
सुरक्षाकर्मीहरू पनि रणनीतिक स्थानमा मात्र खटिन थालेका छन्। नेपाली सेना अहिले सडकमा देखिँदैन, बरु नेपाल प्रहरी र सशस्त्र प्रहरी बलले जिम्मेवारी सम्हालेका छन् ।
पसल, होटल, बजार खुल्न थालेका छन् र सर्वसाधारणको दैनिक जीवन सामान्य अवस्थामा फर्कन थालेको छ । सार्वजनिक यातायात सञ्चालन पुनः सुरु हुनुले नागरिक जीवनमा सकारात्मक प्रभाव पार्ने संकेत गरेको छ। यद्यपि, यो प्रक्रिया स्थानीय प्रशासनसँगको स्पष्ट समन्वय र सुरक्षाको ग्यारेन्टीका आधारमा अघि बढ्नुपर्ने महासङ्घको जोड रहेको छ ।
