नेपालगञ्ज असोज १ – भदौ २४ गतेको जेन-जी आन्दोलनको छायाँ बाँकेको सुरक्षातन्त्रमा अझै बाक्लिएको छ। आन्दोलनका नाममा भएको सरकारी कार्यालयहरूमा आगजनी, तोडफोड र लुटपाट काण्डमा संलग्न दुई जनालाई प्रहरीले पक्राउ गरेको छ, भने अरूको खोजी तीव्र रूपमा जारी छ।
दुई आरोपी पक्राउ – जयसपुरका शालिकराम र दीपक
जिल्ला प्रहरी कार्यालय बाँकेका अनुसार, नेपालगञ्ज जयसपुर निवासी शालिकराम पाठक र दीपक टमाटालाई आगजनी, तोडफोड तथा लुटपाटमा संलग्न रहेको अभियोगमा पक्राउ गरिएको हो।
प्रहरी प्रवक्ता प्रहरी नायब उपरीक्षक (डीएसपी) दीपक पातलीले जानकारी दिए अनुसार, “पक्राउ परेकाहरूले नेपालगञ्ज उपमहानगरपालिका, आन्तरिक राजस्व कार्यालय लगायतका सरकारी संरचनामा क्षति पुर्याएको प्रारम्भिक अनुसन्धानबाट खुलेको छ।”
अन्य संलग्नको पहिचान प्रक्रिया अगाडि बढ्दै
प्रहरीले थप संलग्नहरूको पहिचान र खोजी प्रक्रिया अगाडि बढाइसकेको छ। डीएसपी पातली भन्छन्, “यो योजनाबद्ध गतिविधि थियो भन्ने देखिन्छ, त्यसैले संलग्न सबैलाई कानुनी दायरामा ल्याइनेछ।”
५० भन्दा बढी संरचनामा क्षति
भदौ २४ गते नेपालगञ्ज र कोहलपुरमा भएको आन्दोलन हिंसात्मक मोडमा जाँदा ५० भन्दा बढी सरकारी तथा निजी संरचनाहरूमा आगजनी, तोडफोड र लुटपाट भएको थियो।
नेपालगञ्ज भन्सार कार्यालयदेखि लिएर जिल्ला प्रशासन, राजस्व, नगरपालिकाका गाडी र भवनहरूसम्म क्षतिग्रस्त भएका थिए।
यसअघि प्रहरीले सार्वजनिक गरेको विवरण अनुसार, तीन सयभन्दा बढी सवारी साधन जलेर नष्ट भएका छन्, जुनमध्ये धेरै नेपालगञ्ज भन्सार कार्यालयमा थिए।
कानूनको कठघरामा ल्याइनेछ
सुरक्षास्रोतहरूका अनुसार, अहिले डिजिटल फुटेज, भिडिओ, स्थानीय प्रत्यक्षदर्शी र अन्य स्रोतको सहायताबाट थप संलग्न पहिचानमा लागिएको छ। प्रहरीले जनतासँग पनि अपील गरेको छ कि यदि कसैसँग घटनासँग सम्बन्धित प्रमाण वा जानकारी छ भने, उनीहरूले प्रहरीलाई सहयोग गर्न अनुरोध गरीएको छ ।
