प्रतिनिधिसभा निर्वाचन: आजदेखि औपचारिक प्रचार–प्रसार सुरु

काठमाडौं – प्रतिनिधिसभा सदस्य निर्वाचनका लागि आजदेखि औपचारिक रूपमा निर्वाचन प्रचार–प्रसार सुरु भएको छ। निर्वाचन आयोगका अनुसार, मतदान हुने दिनभन्दा १५ दिन अघि मात्र उम्मेदवार र राजनीतिक दलहरूले जुलुस, आमसभा, कोणसभा गर्न र सञ्चारमाध्यममार्फत प्रचार सामग्री प्रकाशन वा प्रसारण गर्न पाउने व्यवस्था छ।
यसैअनुसार, आजदेखि फागुन १८ गते राति १२ बजे सम्म सबै दल तथा उम्मेदवारले प्रचार–प्रसार गर्न सक्नेछन्। आयोगले मतदाता र निर्वाचनको निष्ठा सुनिश्चित गर्न निर्वाचन आचारसंहिताको पूर्ण पालना गर्न सबै पक्षलाई स्मरण गराएको छ।
निर्वाचन प्रचार–प्रसारका क्रममा उम्मेदवारहरूले तोकिएको मापदण्डअनुसार पत्रपत्रिका र अनलाइन सञ्चारमाध्यममार्फत पनि विज्ञापन जारी गर्न सक्नेछन्। आमसभा वा कोणसभा सञ्चालन गर्दा मञ्च तयारीमा लागेको खर्चको विवरण सम्बन्धित उम्मेदवारले निर्वाचन कार्यालयमा पेश गर्नुपर्ने छ।
निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले भनेका छन्, “आचारसंहिता उल्लंघनमा शून्य सहनशीलता नीति अवलम्बन गरिएको छ। उल्लंघनकर्तालाई स्पष्टीकरण सोध्ने, दण्ड–जरिवाना र आवश्यक परे उम्मेदवारी खारेजसमेत गर्ने कानुनी व्यवस्था छ।”
साथै आयोगले सामाजिक सञ्जाल र अनलाइन माध्यममा फैलाइने मिथ्या सूचना, दुष्प्रचार र द्वेषपूर्ण अभिव्यक्ति निषेध गरिएको जानकारी पनि दिएको छ।
निर्वाचन आयोगले उम्मेदवार र राजनीतिक दललाई आचारसंहिताको पालना गर्दै निष्पक्ष र शान्तिपूर्ण प्रचार–प्रसार गर्न सबै पक्षसँग प्रतिबद्धता सुनिश्चित गरेको छ।