बाँकेको कोहलपुरमा पहिलोपटक राष्ट्रिय स्तरको टि–२० क्रिकेट प्रतियोगिता आयोजना हुने भएको छ। यही फागुन २८ गतेदेखि सुरु हुने कोहलपुर प्राइड लिगले स्थानीय क्रिकेट विकाससँगै कोहलपुरलाई राष्ट्रिय स्तरमा चिनाउने अपेक्षा गरिएको छ ।
प्रतियोगिताको तयारी अहिले तीव्र पारिएको आयोजकले जनाएको छ । कोहलपुर–११ स्थित प्रस्तावित अन्तर्राष्ट्रिय क्रिकेट मैदानमा पिच निर्माण, मैदान व्यवस्थापन र आवश्यक पूर्वाधार तयार पार्ने काम तीव्र गतिमा भइरहेको छ ।
प्रतियोगिताका संयोजक विनायक गिरीका अनुसार क्रिकेटलाई माध्यम बनाएर कोहलपुरलाई खेलकुदको नयाँ केन्द्रका रूपमा विकास गर्ने उद्देश्यले प्रतियोगिता आयोजना गर्न लागिएको हो । उनले प्रतियोगितामा राष्ट्रिय क्रिकेट टोलीका खेलाडीहरू विनोद भण्डारी, भिम सार्की र कुशल मल्लको सहभागिता रहने जानकारी दिए ।
प्रतियोगितामा देशका विभिन्न स्थानबाट आएका ६ क्लबले प्रतिस्पर्धा गर्नेछन् । सहभागी टिमहरूमा युनाइटेड क्लब, कोहलपुर स्पोर्ट एकेडेमी, हिमालयन क्रिकेट एकेडेमी, एस.के. कलेज धनगढी, न्यू होराइजन भैरहवा र ब्राइडल्याण्ड स्कुल रहेका छन् । पाँच दिनसम्म सञ्चालन हुने प्रतियोगितामा प्रत्येक दिन दुई खेल आयोजना गरिनेछ ।
प्रतियोगितामा विजेता टोलीले ४ लाख रुपैयाँ तथा उपविजेताले २ लाख रुपैयाँ नगद पुरस्कार प्राप्त गर्नेछन् । त्यस्तै उत्कृष्ट बलर र उत्कृष्ट ब्याटरलाई जनही १० हजार रुपैयाँ पुरस्कार प्रदान गरिने आयोजकले जनाएको छ ।
करिब ३० लाख रुपैयाँ लागत अनुमान गरिएको प्रतियोगिताको मुख्य प्रायोजक क्याम्पा बेभरेज रहेको छ भने कोहलपुर नगरपालिका संरक्षकका रूपमा रहनेछ । प्रतियोगिताको आतिथ्यता सिद्धार्थ होटलले गर्नेछ भने बाँके जिल्ला क्रिकेट संघले समन्वय गर्नेछ ।
प्रतियोगिताको उद्घाटन समारोहमा नेपाली राष्ट्रिय क्रिकेट टोलीका पूर्व कप्तान पारस खड्का प्रमुख अतिथिका रूपमा सहभागी हुनेछन् । साथै राष्ट्रिय कलाकार टंक तिमिल्सीनाको विशेष प्रस्तुति पनि रहने आयोजकले जनाएको छ ।
खेल हेर्न आउने दर्शकका लागि कुनै शुल्क नलाग्ने व्यवस्था गरिएको छ । आयोजकले प्रतियोगितालाई सफल बनाउन खेलप्रेमीलाई मैदानमै उपस्थित भएर खेलाडीहरूलाई हौसला दिन आग्रह गरेको छ ।
पत्रकार सम्मेलनमा राष्ट्रिय क्रिकेट टोलीका पूर्व कप्तान लेकबहादुर क्षेत्रीले यस्ता प्रतियोगिताले कोहलपुरमा क्रिकेटको विकासमा महत्वपूर्ण योगदान पुग्ने विश्वास व्यक्त गरे । प्रतियोगिताको मिडिया कोअर्डिनेटरका रूपमा संजय मण्डल रहेका छन् ।
