बैजनाथमा हसिया प्रहारबाट एकको मृत्यु, सिङ्गो गाउँ शोकमा

बाँके – बैजनाथ गाउँपालिका–५ अन्तर्गत छमनिया बिजयनगरमा २०८२ साल चैत ३ गते बिहान अन्दाजी ९:१५ बजे भएको धारिलो हतियार प्रहारको घटनामा एक जनाको मृत्यु भएको छ भने अर्का एक जना घाइते भएका छन्।
स्थानीय स्रोतका अनुसार ५० वर्षीय भवानी थारुलाई सोही वडाको बनकटवा निवासी ५५ वर्षीय सिताराम थारुले हसिया प्रहार गरेका थिए। प्रारम्भिक जानकारीअनुसार आपसी विवादका क्रममा घटना भएको बताइएको छ। भवानी थारुको गर्दन र टाउकोमा गम्भीर चोट लाग्दा घटनास्थलमै मृत्यु भएको जनाइएको छ।
घटनामा मृतकका ३५ वर्षीय छोरा समेत घाइते भएका छन्। उनलाई टाउकोमा धारिलो हतियारले चोट लागेपछि उपचारका क्रममा ७ वटा टाँका लगाइएको स्थानीयले बताएका छन्। घाइतेको अवस्था खतरामुक्त रहेको बुझिएको छ।
घटना लगत्तै इलाका प्रहरी कार्यालयको टोली घटनास्थल पुगेको थियो। प्रहरीले आरोपित सिताराम थारुलाई नियन्त्रणमा लिई थप अनुसन्धान अघि बढाएको जनाएको छ। नेपाल प्रहरी का अनुसार घटनाको कारण, पृष्ठभूमि तथा विस्तृत विवरणबारे छानबिन भइरहेको छ।
यस दुखद घटनाले सिंगो गाउँ शोकमा डुबेको छ। स्थानीयवासीले शान्ति कायम राख्न आग्रह गर्दै यस्ता घटना दोहोरिन नदिन सम्बन्धित निकायको ध्यानाकर्षण गराएका छन्।
पीडित परिवारले दोषीलाई कानुनअनुसार कडा कारबाही गर्न तथा क्षतिपूर्तिसहित न्याय दिलाउन माग गरेका छन्। प्रहरीले कानुनी प्रक्रिया अनुसार आवश्यक अनुसन्धान तथा कारबाही प्रक्रिया अघि बढिरहेको जनाएको छ।