बाँके, बैजनाथ -बैजनाथ गाउँपालिका–३ नौवस्ता निवासी वर्ष २४ का अधिश कुमार थारुको सवारी दुर्घटनामा मृत्यु भएको छ।
शनिबार बिहान करिब ७:४५ बजे दैनिकी ज्यालादारी कामका लागि जाने क्रममा बानियाभार–सुतैयापुल नजिकै कर्णाली प्रदेश ०२००१ च १५७२ नम्बरको बोलेरो च्याम्बरले ठक्कर दिँदा उनी गम्भीर घाइते भएका थिए।
गम्भीर घाइते थारुलाई उपचारका लागि नेपालगन्ज मेडिकल कलेज लगिएको भए पनि चिकित्सकले मृत घोषणा गरेको इलाका प्रहरी कार्यालय कोहलपुरले जनाएको छ।
दुर्घटनामा संलग्न चालक गोरख बहादुर बुढा (३८) खत्याड गाउँपालिका–५, मुगु निवासी रहेको बताइएको छ। घटनाबारे थप अनुसन्धान भइरहेको प्रहरीले जानकारी दिएको छ।
