सांसद नबने पनि उद्देश्य पुरा : कलाकार प्रकाश सपुत

काठमाडौं । प्रतिनिधि सभा निर्वाचनमा सहभागी भएका कलाकार प्रकाशले आफू सांसद बन्न नसकेको भए पनि आफ्नो राजनीतिक उद्देश्य पुरा भएको बताएका छन्। सामाजिक सञ्जालमार्फत सार्वजनिक लामो अभिव्यक्तिमा उनले व्यक्तिगत जितभन्दा पनि समग्र राजनीतिक परिवर्तन आफ्नो प्राथमिक लक्ष्य रहेको स्पष्ट पारेका छन्।
उनले यसपटकको निर्वाचनमा होमिँदा तीन मुख्य उद्देश्य राखेको उल्लेख गरेका छन्—पुरानो राजनीतिक अभ्यास, अस्थिरता र भ्रष्टाचार अन्त्य गर्दै नयाँ राजनीतिक शक्तिलाई स्थापित गर्न सहयोग गर्ने, स्थायी सरकार निर्माणका लागि खुलेर लाग्ने तथा उत्पीडित समुदायका मुद्दालाई सशक्त रूपमा उठाइरहने।
प्रकाशले आफूले कुनै क्षेत्र विशेषका लागि नभई परिवर्तनको पक्षमा मत माग्दै हिँडेको बताएका छन्। “मेरो व्यक्तिगत गुनासो छैन, तर मलाई सदनमा देख्न चाहने शुभेच्छुक र जन्मगाउँका लागि भने दुःखी छु,” उनले लेखेका छन्।
आफू उत्पीडित समुदायमा जन्मिएको स्मरण गर्दै उनले बाल्यकालदेखि नै समाजप्रति विद्रोही चेत बोकेको तर त्यसलाई सिर्जनशील बाटोमा रूपान्तरण गरेको बताएका छन्। कलाकारितासँगै सामाजिक र राजनीतिक चेत पनि आफूभित्र सधैं जीवित रहेको उनको भनाइ छ।
यदि सांसद बनेको भए उत्पीडित समुदायका अधिकार, नेपाली मौलिक संस्कृति र पर्यटन क्षेत्रसँग सम्बन्धित ठोस नीति निर्माणमा केन्द्रित हुने तयारी गरेको उनले खुलाएका छन्। यसका लागि विभिन्न अधिकारकर्मी, संस्कृतिकर्मी र व्यवसायीसँग छलफलसमेत अघि बढाएको उनको दाबी छ।
समानुपातिकतर्फ समेटिन नसकेपछि Rabi Lamichhane ले फोनमार्फत हौसला दिएको उल्लेख गर्दै उनले पार्टीभित्र वा बाहिर रहेर पनि देशका लागि योगदान गर्न सकिने बताएका छन्।
“यदि परिवर्तनको पक्षमा उभिएकै कारण मेरो कलाकारिताको कद घटेछ भने म माइक्रोफोन छोडेर हलो समाउन पनि तयार छु,” उनले उल्लेख गरेका छन्।
अब भने पुनः कलाकारितामै केन्द्रित हुँदै सिर्जनात्मक माध्यमबाट समाजलाई योगदान गर्ने उनले जनाएका छन्। “म समाज र राज्यको नजरमा एक समान मान्छे हुन चाहन्छु,” उनले अभिव्यक्ति टुंग्याएका छन्।