काठमाडौं भदौ २३– राजधानीमा जारी जेनजी आन्दोलनमा केही स्वार्थी समूह र बाह्य तत्वहरूले घुसपैठ गरेको आशङ्का गरिएको छ । यसैकारण, जेनजी नेपालले प्रदर्शनमा सहभागी युवाहरूलाई तत्काल सुरक्षित तरिकाले फिर्ता हुन स्पष्ट आह्वान गरेको छ ।
जेनजी नेपालले आफ्नो फेसबुक पेजमार्फत जारी गरेको सूचनामा भनिएको छ, “हामी सबैलाई अनुरोध छ कि तत्काल सुरक्षित रूपमा प्रदर्शन स्थलबाट बाहिर निस्किनुहोस्। केही घुसपैठ र स्वार्थ प्रेरित समूहहरूले प्रदर्शनलाई उत्तेजित पार्ने प्रयास गरेका छन् । हाम्रो मूल कार्यक्रम सफल भइसकेको छ। यसैले सबैजना घर फर्किएर आफ्नो सुरक्षा सुनिश्चित गर्नुहोस् ।
आन्दोलनका आयोजकहरूले यो कदम प्रदर्शनलाई शान्तिपूर्ण र नियन्त्रणमा राख्नको लागि उठाएको प्रयास भएको उल्लेख गरेका छन् । युवाहरूलाई अनावश्यक जोखिममा नरहन र कुनै पनि अप्रिय घटना नहोस् भन्ने लक्ष्यका साथ यो सूचना जारी गरिएको हो ।
यसअघि जेनजी आन्दोलनले सामाजिक सञ्जालमाथिको सरकारले लगाएको प्रतिबन्ध र बढ्दो भ्रष्टाचार विरुद्ध देशव्यापी रूपमा आक्रोश प्रदर्शन गर्दै आएको छ। तर केही समूहहरूको गतिविधिले आन्दोलनलाई राजनीतिक र सामाजिक अस्थिरताको जोखिममा पुर्याउन सक्ने खतरा बढेको छ ।
प्रशासन र आन्दोलनका संयोजकहरूबीच समन्वय गर्दै शान्ति र सुरक्षा कायम राख्न प्रयास भइरहेको छ । नागरिकहरूलाई पनि संयम र कानूनको पालना गर्दै आन्दोलनलाई शान्तिपूर्ण बनाउनेमा सहयोग गर्न अपिल गरिएको छ ।
